buduunee

***Дотогшоо***

2011 оны 06-р сарын 03 Нийтэлсэн bataa

Зүрх минь шувуу болон нисээд

Зүүдрүү од мэт харван одлоо

Эцэсгүй, төгсгөлгүйн хязгаарт тэр

Элин халин ниснэ, ирээдүйг зөгнөнө.

Харц минь нар болон мандаад

Харанхуйд гэрэл болон гийнэ

Дотогшоо, өнгөрсөнд тэр шунан дурлаад

Дорноос өрнийг бэдэрнэ, гадагш урсана.

Мөрөөдөл минь үүр болон хаяараад

Мөнхийн гэрэлт зул болон бадамлана

Мөч бүхнийг өөрхийнхөөрөө зурж

Мөн чанарт оршиж цаг хугацааг эрхшээнэ.

***Жаргалын тухай***

2011 оны 04-р сарын 14 Нийтэлсэн bataa

Жаргахсан гэж бид зовлонг туучна

Жаахан хүү өтөл болтлоо зовно

Жаргал чи хэнд хэрэгтэй вэ?

Жаргахсан гэж нар тэнгэрийг туучна

Жавар тачигнасан үүрээс шөнө болтол зүтгэнэ

Жаргал чи хэнийг дуудна вэ?

Жаргахсан гэж зулын гэрэл харанхуйг туучна

Жаргалын эрэлд одсон, үлдсэн бүгдийг гэгээрүүлэхээр шатна

Жаргал чи хэнээр зугаацна вэ?

Жаргахсан гэж аз жаргал бүхнийг туучна

Жаргалд төөрсөн бүхнийг дагуулахаар ирнэ

Жаргал чи хаана байна вэ?

Аз жаргал чи

Алдсан бүхий л хугацаа

Ард үлдсэн бүхэн

Асаж буй дэнгийн дөл....

***Нэг л мэдэхэд***

2010 оны 12-р сарын 23 Нийтэлсэн bataa

Өглөөхөн болж өнгөрсөн

Их л даруухан оршуулга

Өдрийн хотын чимээнд дарагдаж

Нэг л мэдхэд мартагдана....

Чиний мартахгүй гэсэн үгс

Үдшийн бороо шиг хатаж

Намайг дурссан нулимс

Маргааш цас болон царцана... 

Хэн нэгэн түүнийг санаж

Ганц хундага өргөхөд

Хэн нэгний нулимс мэт

Хацар дээр алгуурхан хатна

Хаа нэгтээ цэцэг ургана....

***Яг л чам шиг***

2010 оны 08-р сарын 27 Нийтэлсэн bataa
Хэрхэн гуниглаж

Яг л чам шиг

Нулимсаа навчис болгон бүгдийг гээж орхиод

Хавар болохыг хүлээж

Яг л чам шиг

Намар намрын уйг хэн нэгний зүрхэнд шивнэж

Шүлэг төрөхийг хүлээж

Яг л чам шиг

Хэрхэн гуниглаж

Хэн нэгний сэтгэлд

Шүлэг мэт орших вэ?

Зүр-Харц

2010 оны 06-р сарын 02 Нийтэлсэн bataa

Зүрх гайхсан

Тэгээд л тэр харцыг маш тод тогтоосон

Зүрх хайсан

Тэгээд л тэр харцыг маш ихээр үгүйлсэн

Зүрх олсон

Тэгээд л тэр харцыг алдалгүй дагасан

Зүрх мэдэрсэн

Тэгээд л тэр харцанд дулаацаж эхэлсэн

Зүрх сонссон

Тэгээд л тэр харцыг бусадтай харьцуулж эхэлсэн

Зүрх мэдсэн

Тэгээд л тэр харцнаас өөрийг хүсэхгүй болсон

Зүрх айсан

Тэгээд л тэр харцыг зөвхөн өөрийгөө харахыг л хүссэн

Зүрх эргэлзсэн

Тэгээд л тэр харцыг зүгээр л зөнгөөр нь орхиод ажигласан

Зүрх итгэсэн

Тэгээд л тэр харц зөвхөн түүнийг л тэгж хардагийг ойлгосон.....

Алс холын дуун

2010 оны 05-р сарын 21 Нийтэлсэн bataa

Алс холын дуун

Зүрхний ховилд

Аярхан бас чанга

Зүүд мэт тод

Зүүд мэт бүдэг....

Надад шивнэсэн

Хэдхэн үнэн үг

Зүрхэнд аярхан хашгирч

Зөвхөн өнгөрсөнд үлдсэн

Танил хоолой

Зөн совингийн дуудлага.....

Эргэлзээг хийсгэж

Эр зоригийг дуудсан

Эгэл ертөнц

Миний” ертөнцийн

Алс холын дуун....

Гуниг

2010 оны 04-р сарын 27 Нийтэлсэн bataa

Гуниглаж

Гунигаараан шүлэг бичихсэн гэж санааширч

Гуравхан мөр холбож

Гуравхан мөрний хоёрт нь

Гунхсан нэгнийг мөрөөдөж

Гуниж

Гунихдаа баярлаж, дотогшоо өмөлзөж

Гуйж ирээгүй хэмээн шүд зууж

Гуйж хэн нэгний төлөө амьд явах

Гуниглал

Sexy chick-David Guetta feat Akon

2010 оны 04-р сарын 21 Нийтэлсэн bataa

Цаг хугацаа

2010 оны 04-р сарын 21 Нийтэлсэн bataa

Цаг хугацааны өмнө

Шуналгүй, нүгэлгүй тэр харц

Цөцгий нь яг сэтгэл шигээ

Цав цагаан хиргүй

Цагийн зүү ямар нэгэн

Цифрийг өнгөрөх бүрт

Бүдгэрсэн нүдний гал

Бүлээссэн халуун сэтгэл

Цагийн баадуу зогсоход

Чангалах гэж оролдох хар

Сүүлчийн найдвараа тээн

Сүү шиг цагаан болохыг хүснэ

Цаг хугацааны өмнө

Шуналгүй, нүгэлгүй тэр сүнс

Цөхрөл нь яг л итгэл шигээ

Цав цагаахан хиргүй……

Хайрлаж яваа намайг

Хаа нэгтээгээс Миний Бурхан

Мөрөөдлийг минь үргэлжид сонсож

Мөч бүхэнд зүрхэний минь галыг ноцоож суугаа

Хаврын салхиар цээжийг минь илбэж

Хажууханд гоо цэцэгсийг дэлгэрүүлэн яваа

Хатуу хорвоог зөөллөн алгаа дэвсэн бөмбөрүүлж

Хан тэнгэрийн оддод хүслийг минь шивнэн ерөөж байгаа

Анхны бороон дуслаар бодлын цангааг тайлж

Айсуй зуны үнэрийг Монголд минь тээсээр авчраа

Алдаж онохын тавиланд үйлийн үрийн ариулж

Амин зүрхний шившлэг Монгол нэрийг дархалж суугаа

Хайрлаж яваа намайг

Хаа нэгтээгээс Миний Бурхан

Хүн байсан би

2010 оны 03-р сарын 23 Нийтэлсэн bataa

Хүн байсан би

Хүнд итгэж чаддаг

Хүссэн үгээ хэлж чаддаг

Хүндэтгэж настанд туслаж чаддаг

Хүүхдээрээ, цагаахнаараа Хүн байсан би

Хүн байсан би

Хөөрхөн охидод дурлаж чаддаг

Хөөргөн сэтгэлээр шүлэглэж чаддаг

Хөдсөн дээлэндээ нойрсож чаддаг

Хөрөөгүй халуун сэтгэлтэй Хүн байсан би

Хүн байсан би

Хариу нэхэлгүй тусалж чаддаг

Харцандаа галтай дүрэлзэж чаддаг

Халх нутгаа хайрлаж, харамлаж чаддаг

Хайраар, итгэлээр дүүрэн Хүн байсан би

Чи ирэх болоогүй юу?

2010 оны 03-р сарын 19 Нийтэлсэн bataa

Чи ирэх болоогүй юу?

Чиний асаагаад одсон дурлал бүдгэрч байна......

Өнгөрсөн бүхий л хугацаа бодол ээрч үзэгдээд

Өрөөлийн энгэрт нялхарсан чамайг хүлээгээд удлаа

Өчигдөрхөн халуунаараа, үнсэлтэнд чинь бялхсан жаргал

Өөрийг минь зовоосон тэнэглэл болон хувирч байна

Өчигдөрхөн хэлсэн янагийн халуун үгс чинь

Өөр бусдын сэтгэлд хайрын сарнайг цэцэглүүллээ

Өчигдөр, өчигдөр, өчигдөр.......................

Чи ирэх болоогүй юу?

Чиний надад үлдээсэн нулимс ширгэж байна......

Өөрийгөө мартаж хайрласан дурлал эзгүйрч

Өөрийгөө л зүхэж чадах хувь тавилангийн боол болоод удлаа

Өнөөдөр хүлээлтийн сүүлчийн өдөр гэсэн тэвчээр

Өрцний минь цаана нуран унаж байна

Өнөөдөр л зөвхөн гэж өөрийгөө хуурсан хүлээлт

Өглөө бүр шинээр эхэлж уйтгараар тэвчээрийг эзэмдлээ

Өнөөдөр, өнөөдөр, өнөөдөр.........................

Чи ирэх болоогүй юу?

Чиний ноцоогоод орхисон хайр бөхөж байна.....

Зүрхэнд чиний зай хоосорч харанхуйлаад

Зүүдэнд чиний дүр үгүйлэгдэж царайг чинь үзэлгүй удлаа

Маргааш л инээмсэглээд хүрээд ирнээ гэсэн итгэл

Магадгүй яг одоо алдарч сэтгэл минь хоосорч байна

Маргааш даан ч дуусдаггүйн үлгэрээр

Магадгүй маргааш л ирнэ дээ гэсэн цөхрөл итгэлийг дарлаа

Маргааш, маргааш, маргааш...................

Үгс

2010 оны 03-р сарын 18 Нийтэлсэн bataa

Бор хоног цагаан шөнө

Бодол бас зөн совин

Босоо заяа хэвтээ зовлон

Богинхон бас урт амьдрал

Хар буян цагаан нүгэл

Хайр бас үзэн ядалт

Хатуу хорвоо зөөлөн замбуулин

      Хамаг монгол халиуны зулзага

Зүггүй хандлага зүгээр л үгс

Зүйдэлгүй бас хязгааргүй

Зөвхөн чи зөнгөөрөө тэнүүлч

Зөрлөг бүхэн цаг хугацаа

Сүүлчийн цасны шивнээ

2010 оны 03-р сарын 16 Нийтэлсэн bataa

Сүүлчийн цасны гунигт нулимс хүйт даан

сүүмэлзсээр, цонх бүрхэн урсах нь

сүүлчийн удаа л чи нулимсыг минь арчаач гээд

сүү мэт цагаахан биеэ, эс тоон шаварт хутгах шиг

нэг нь явж нөгөө нь ирдэг энэ орчлонд

нэрийг минь хүмүүс маргааш мартаж

нөгөөдөр бороонд зусардах үед

сэтгэл сэргэх өвлийн талыг санаарай

сэрүүн салхинд намайг нэг дурсаарай гэх шиг....

Амьдрал чи намайг юунд ингэтэл санаашруулж
Арчаагүй нэгнийг нь биш аавыг минь аваад одсон юм бэ
Асгартал уйлая гэлээ ч замд нь садаа болдог гээд
Аньсганд хурсан нулимсаа дотогшоо залгиж тэвчсэн дээ
Арван гурван настай балчир хүүгээ орхиод
Амь шигээ хайрладаг байсан хөөрхөн охиноо үлдээгээд
Асралт сайхан хань миний ижийгээс буруулаад
Алсын нэгэн одруу анир чимээгүй одож
Аяархан мартагнуулж алсарсаар арван жил өнгөрч дээ
Аниргүй шөнийн нойрон дунд таныгаа л бодсоор унтаж
Алсын оддын гялбаа тэргүүнд гэрэлтэн байхуйд
Аав минь та зүүд үргээж ирнэ
                      зүрх уярааж хэлнэ

Тэртээх жилүүдийн түүчээнд үлдэж хоцорсон боловч
Тэвэрч өсгөсөн юм шүү та нарыгаа аавынх нь босоо хийморь
Тэнгэр эрхэс, ер эгэл юм бүхнээс
Тэтгэж өргөсөн юм шүү аавынх нь босоо заяа
Тэвчээрээр хэрэм хийн амьдралын шуургыг сөрөөрэй
Тэргэл саран шиг гэрэлтэх өөрийнхөө итгэлээр бамбарлаарай
Цэнгэн жаргаж явахдаа хүн хэвээрээ яваарай
Цэцгийн гурван сардаа ээждээ нэг очоорой хэмээн 
Зүрхэнд минь шивнэхдээ нулимстай байдагаа аавын минь төрх
Зүүдийг минь жаргаахдаа гунигтай байдагаа аавын минь сэтгэл
Зөн совингийн орноос яаран ирээд жаргалтай буцахдаа аав минь
Зүг зүгийн бурхадтай хийморийг минь тэтгэсээр оршдог оо




  -
амгалан жаргах болтугай!!!